കുന്നംകുളം : വ്യക്തിവൈരാഗ്യത്തെ  തുടർന്ന് പെരുമ്പിലാവിൽ മധ്യവയസ്കനെ വെട്ടിക്കൊലപ്പെടുത്താൻ ശ്രമിച്ച സംഭവത്തിൽ ഒരാളെ കുന്നംകുളം പോലീസ് അറസ്റ്റ് ചെയ്തു. ചാട്ടുകുളം സ്വദേശി വശ്യംവീട്ടിൽ 24 വയസ്സുള്ള മൻസിഫിനെയാണ് കുന്നംകുളം സ്റ്റേഷൻ ഹൗസ് ഓഫീസർ യുകെ ഷാജഹാന്റെ നേതൃത്വത്തിലുള്ള പോലീസംഘം അറസ്റ്റ് ചെയ്തത്.

കഴിഞ്ഞ ജൂൺ 19 ന് രാത്രി 8.30 ഓടെയായിരുന്നു സംഭവം. പെരുമ്പിലാവ് കൊരട്ടികരയിൽ നിൽക്കുകയായിരുന്ന കടവല്ലൂർ പടിഞ്ഞാറ്റുമുറി പരിത്തൂർ വീട്ടിൽ 50 വയസ്സുള്ള ഷൈജനെവ്യക്തിവൈരാഗ്യത്തെ തുടർന്ന്  പ്രതി വെട്ടിക്കൊലപ്പെടുത്താൻ ശ്രമിച്ചത്. വാൾ ഉപയോഗിച്ച് വെട്ടേറ്റ് പരിക്കേറ്റ ഷൈജനെ സ്വകാര്യ ആശുപത്രിയിൽ പ്രവേശിപ്പിച്ചിരുന്നു. സംഭവത്തിലെ അഞ്ചാംപ്രതിയാണ് മൻസിഫ്. 

അടുത്തിടെ പെരുമ്പിലാവ് പാതാകരയിൽ കുന്നംകുളം പോലീസ് സ്റ്റേഷനിലെ സ്പെഷ്യൽ ബ്രാഞ്ച് ഉദ്യോഗസ്ഥനെ ഓടിച്ചിട്ട് വെട്ടിക്കൊലപ്പെടുത്താൻ ശ്രമിക്കുകയും. തുടർന്നു സ്പെഷ്യൽ ബ്രാഞ്ച് ഉദ്യോഗസ്ഥന്റെ ബൈക്ക് ഉപയോഗിച്ച് രക്ഷപ്പെടുകയും സംഭവത്തിൽ പ്രതികളെ പിടികൂടാൻ ശ്രമിക്കുന്നതിനിടെ കുന്നംകുളം നഗരത്തിൽ വച്ച് കുന്നംകുളം സ്റ്റേഷനിലെ സിവിൽ പോലീസ് ഓഫീസർ ഇ കെ ഹംദിനെ ഗുരുതരമായി മർദ്ദിച്ച് പരിക്കേൽപ്പിക്കുകയും ചെയ്ത  സംഘത്തിൽ അറസ്റ്റിലായ പ്രതികളുടെ സംഘത്തിലുള്ളയാളാണ് അറസ്റ്റിലായ മന്സിഫ് എന്ന് പോലീസ് പറഞ്ഞു.