നിയന്ത്രണം വിട്ട് മറിഞ്ഞ മിനിലോറിയിൽ അരക്കോടി രൂപയുടെ പാൻ മസാല
കൊടുങ്ങല്ലൂർ: നിയന്ത്രണം വിട്ട് മറിഞ്ഞ മിനിലോറിയിൽ നിന്ന് അരക്കോടി രൂപയുടെ പാൻ മസാല പിടികൂടി. ഇന്നലെ പുലർച്ചെ രണ്ട് മണിയോടെ മതിലകം സി.കെ.വളവിൽ ദേശീയ പാതയിലാണ് അപകടം നടന്നത്. അപകടം നടന്നയുടനെ വാഹനത്തിലുണ്ടായിരുന്നവർ ഓടി രക്ഷപ്പെട്ടു. സംഭവത്തിന് ശേഷം മതിലകം പോലീസെത്തി പരിശോധിച്ചപ്പോഴാണ് ലക്ഷ കണക്കിന് രൂപയുടെ പാൻമസാല കണ്ടെത്തിയത്‌.
പഞ്ചസാര ചാക്കുകൾക്കും അരിചാക്കുകൾക്കും ഇടയിൽ പാൻമസാല ചാക്കുകൾ ഒളിപ്പിച്ച നിലയിലായിരുന്നു. നൂറിലധികം ചാക്കുകളിലായി ഹാൻസ്, കൂൾലിപ്, ഗണേഷ് തുടങ്ങിയ ബ്രാൻഡുകളിലുള്ള പാൻ മസാലയാണ് കണ്ടെടുത്തത്. ഏകദേശം അരക്കോടിയിലധികം രൂപ വില കണക്കാക്കുന്നു. പൊള്ളാച്ചിയിൽ നിന്ന് പെരുമ്പാവൂരിലേക്ക് കടത്തിയിരുന്ന പാൻ മസാലയാണ് പിടികൂടിയത്. കുന്നംകുളം സ്വദേശിയുടെതാണ് മിനിലോറി. വെളിയങ്കോട് സ്വദേശിക്ക് ഒരു മാസത്തേക്ക് മിനിലോറി വാടകക്ക് കൊടുത്തതാണെന്ന് വാഹന ഉടമ പറയുന്നു.
രക്ഷപ്പെട്ട പ്രതികളെ കുറിച്ച് വിവരം ലഭിച്ചിട്ടുണ്ടെന്ന് പോലീസ് പറഞ്ഞു. മതിലകം ഇൻസ്പെക്ടർ ടി.കെ.ഷൈജു, എസ്.ഐ വി.വി.വിമൽ, എ.എസ്.ഐമാരായ പ്രദീപ്, വിപീഷ്, സീനിയർ സി.പി.ഒ മാരായ സൈഫുദ്ദീൻ, ഷൈജു, ആൻ്റണി എന്നിവർ മേൽനടപടികൾ സ്വീകരിച്ചു
Leave A Comment