പൂട്ടിയിട്ട വീട്ടിൽ നിന്ന് 10 പവൻ സ്വർണ്ണം കവർന്നു : രണ്ട് തമിഴ്നാട് സ്വദേശികൾ അറസ്റ്റിൽ
വരന്തരപ്പിള്ളി : മുപ്ലിയത്ത് വീട്ടുകാരില്ലാത്ത സമയം പൂട്ടിയിട്ട വീട്ടില്‍ നിന്ന് പത്ത് പവന്‍ വരുന്ന സ്വര്‍ണാഭരണങ്ങള്‍ മോഷ്ടിച്ച തമിഴ്നാട് സ്വദേശികളായ യുവതിയെയും യുവാവിനെയും അറസ്റ്റ് ചെയ്തു. തിരുച്ചിറപ്പിള്ളി സ്വദേശി നന്ദ(19), കോയമ്പത്തൂര്‍ സ്വദേശി അനുസിയ (18) എന്നിവരെയാണ് വരന്തരപ്പിള്ളി പോലീസ് അറസ്റ്റ് ചെയ്തത്.
മുപ്ലിയം മഠപ്പിള്ളിക്കാവ് അമ്പലത്തിന് സമീപം ചുള്ളിപ്പറമ്പില്‍ വിഷ്ണുദാസിന്റെ വീട്ടിലാണ് ഇവർ മോഷണം നടത്തിയത്.
കൊടകര ശാന്തിനഗറില്‍ വാടകയ്ക്ക് താമസിക്കുകയായിരുന്ന ഇവർ ആക്രി കച്ചവടവും നടത്തിവന്നിരുന്നു.
പകൽ സമയം പലയിടങ്ങളിലും വീടുകളിലെത്തി സഹായഭ്യര്‍ത്ഥന നടത്തിയിരുന്നതായും പോലീസ് പറഞ്ഞു.
മുപ്ലിയത്തെ വീട്ടിലെത്തിയ പ്രതികൾ മുൻവശത്തെ ചവുട്ടിക്ക് താഴെ വെച്ചിരുന്ന താക്കോലെടുത്ത് വാതിൽ തുറന്നാണ് അകത്തു കടന്നത്. വീടിനകത്ത് കബോർഡിലിരുന്ന താക്കോലുകൊണ്ട് അലമാര തുറന്ന മോഷ്ടാക്കൾ ആഭരണങ്ങളുമായി കടക്കുകയായിരുന്നു. തിങ്കളാഴ്ച ഉച്ചയോടെയായിരുന്നു സംഭവം.
പ്രദേശത്ത് ചുറ്റിത്തിരിഞ്ഞിരുന്ന തമിഴ് യുവതീ-യുവാക്കളെക്കുറിച്ച് നാട്ടുകാർ സംശയം പ്രകടിപ്പിച്ചിരുന്നു. ഇതേ തുടർന്ന് സമീപ പ്രദേശത്തുള്ള നിരീക്ഷണ ക്യാമറകളിൽ നിന്ന് പോലീസിന് ഇവരുടെ ദൃശ്യങ്ങൾ ലഭിച്ചിരുന്നു. മറ്റൊരു കേസിനെ തുടർന്ന് പോലീസിൻ്റെ പക്കലുണ്ടായിരുന്ന പ്രതികളുടെ ചിത്രം കാണിച്ച് ഉറപ്പു വരുത്തിയ ശേഷമാണ് മോഷ്ടാക്കളെ കസ്റ്റഡിയിലെടുത്തത്.
മോഷ്ടിച്ച സ്വർണാഭരണങ്ങൾ പ്രതികളുടെ കൈയിൽ നിന്നും കണ്ടെടുത്തു. അറസ്റ്റിലായ പ്രതികളെ തെളിവെടുപ്പ് നടത്തിയ ശേഷം ചൊവ്വാഴ്ച വൈകീട്ട് കോടതിയിൽ ഹാജരാക്കി.
Leave A Comment