ഒരു കോടിയുടെ സ്വർണവുമായി 19 വയസുകാരി കരിപ്പൂരിൽ പിടിയിൽ
കോഴിക്കോട്: ഒരു കോ‌ടി രൂപയുടെ സ്വർണവുമായി കരിപ്പൂരിൽ 19വയസുകാരി പിടിയിൽ. കാസർഗോഡ് സ്വദേശി ഷഹലയാണ് വിമാനത്താവളത്തിന് പുറത്തുവച്ച് പി‌ടിയിലായത്. അടിവസ്ത്രത്തിനുള്ളിൽ തുന്നിച്ചേർത്ത നിലയിലാണ് സ്വർണം കണ്ടെത്തിയത്.
ഞായറാഴ്ച രാത്രി 10.30 നാണ് ഷഹല ദുബായിൽ നിന്നും കോഴിക്കോടുള്ള വിമാനത്തിലിറങ്ങിയത്. 11 മണിയോടെ പുറത്തിറങ്ങിയ ഷഹലയെ കസ്റ്റംസ് പരിശോധിച്ചെങ്കിലും ഒന്നും കണ്ടെത്താൻ കഴിഞ്ഞില്ല.
എന്നാൽ പോലീസിന് ലഭിച്ച രഹസ്യ വിവരത്തിന്‍റെ അടിസ്ഥാനത്തിൽ ഷഹലയെ വിമാനത്താവളത്തിന് പുറത്തുവച്ച് വീണ്ടും പരിശോധിച്ചെങ്കിലും സ്വർണക്കടത്ത് കണ്ടെത്താൻ സാധിച്ചില്ല.
പിന്നീട് നടത്തിയ ദേഹപരിശോധനയിലാണ് അടിവസ്ത്രത്തിനുള്ളിൽ മിശ്രിത രൂപത്തിൽ സ്വർണം കടത്തിയതായി കണ്ടെത്തിയത്. മൂന്ന് പാക്കറ്റുകളിലാക്കി 1884 ഗ്രാം സ്വർണമാണ് ഇവർ കൊണ്ടുവന്നത്.
വിപണിയിൽ ഒരു കോടിയോളം വിലമതിക്കുന്നതാണ് ഈ സ്വർണം. തുടർന്ന് പെൺകുട്ടിയെ പോലീസ് അറസ്റ്റ് ചെയ്തു. കരിപ്പൂർ വിമാനത്താവളത്തിന് പുറത്ത് വച്ച് പിടികൂടുന്ന 87മത് സ്വർണക്കടത്ത് കേസാണ് ഇത്.
Leave A Comment