പിതാവ് ഓടിച്ച ഓട്ടോറിക്ഷ നിയന്ത്രണം വിട്ടു മറിഞ്ഞ് പത്തു വയസ്സുകാരൻ മരിച്ചു
തൊടുപുഴ: പിതാവ് ഓടിച്ച ഓട്ടോറിക്ഷ നിയന്ത്രണം വിട്ടു മറിഞ്ഞ് പത്തു വയസുകാരൻ മരിച്ചു. ഉടുമ്പന്നൂര്‍ പനച്ചിക്കല്‍ വീട്ടിൽ സുനീറിന്റെ മകന്‍ മുഹമ്മദ് സഫ്വാന്‍ (10) ആണ് മരിച്ചത്.
ഇന്നലെ(തിങ്കൾ) രാത്രി ഒമ്പതു മണിയോടെ ഉടുമ്പന്നൂര്‍-കരിമണ്ണൂര്‍ റൂട്ടിനു സമീപമായിരുന്നു അപകടം. തൊടുപുഴയില്‍ നടക്കുന്ന മറൈന്‍ എക്‌സിബിഷന്‍ കണ്ടു മടങ്ങുന്നതിനിടെയായിരുന്നു സംഭവം. റോഡ് മുറിച്ചു കടക്കുകയായിരുന്ന മറ്റൊരു കുട്ടിയെ രക്ഷിക്കാന്‍ ഡ്രൈവര്‍ ഓട്ടോ വെട്ടിച്ചപ്പോള്‍ വാഹനം നിയന്ത്രണം വിട്ടു മറിയുകയായിരുന്നെന്ന് പൊലീസ് പറഞ്ഞു.
സമീപത്തെ ഹോട്ടലില്‍ നിന്നും ഭക്ഷണം കഴിച്ചിറങ്ങിയ സംഘത്തിലെ കുട്ടിയാണ് റോഡ് മുറിച്ചു കടന്നത്. ഈ കുട്ടിയെ ചെറുതായി തട്ടിയ ഓട്ടോ റോഡില്‍ വട്ടം മറിഞ്ഞു. ഇതോടെ മുഹമ്മദ് സഫ്വാന്‍ ഓട്ടോയുടെ അടിയില്‍പ്പെടുകയായിരുന്നു. ഉടന്‍തന്നെ പുറത്തെടുത്ത് മുതലക്കോടത്തെ സ്വകാര്യ ആശുപത്രിയിൽ എത്തിച്ചെങ്കിലും ജീവന്‍ രക്ഷിക്കാനായില്ല.
Leave A Comment