പന്നിപ്പനി: മാടക്കത്തറ പഞ്ചായത്തിലെ പന്നിഫാമിൽ കള്ളിങ് നടത്താൻ ഉത്തരവ്
തൃശൂർ: മാടക്കത്തറ പഞ്ചായത്തിൽ ആഫ്രിക്കൻ പന്നിപ്പനി സ്ഥിരീകരിച്ചു. പതിനാലാം വാർഡിലെ കട്ടിലപൂവത്ത് ബാബു വെളിയത്തിന്റെ ഉടമസ്ഥതയിലുള്ള ഫാമിലെ പന്നികളിലാണ് രോഗം സ്ഥിരീകരിച്ചത്. ജില്ലാ കലക്ടറുടെ നിർദ്ദേശ പ്രകാരം പന്നികളെ കള്ളിങ് ചെയ്ത് മറവു ചെയ്യാനുള്ള നടപടികൾ പുരോഗമിക്കുകയാണ്.ഫാമിലെ 310 പന്നികളെയാണ് കള്ളിങ്ങിന് വിധേയമാക്കി മറവു ചെയ്യുന്നത്. രാവിലെ മുതൽ ഡോക്ടർമാർ, ലൈവ്സ്റ്റോക്ക് ഇൻസ്പെക്ടർമാർ, അറ്റൻഡർമാർ എന്നിവർ അടങ്ങുന്ന ആർ.ആർ.ടി സംഘം കള്ളിങ് പ്രക്രിയ നടപ്പാക്കുന്നതിനുള്ള പരിശ്രമത്തിലാണ്. ഇതിനു ശേഷം പ്രാഥമിക അണുനശീകരണവും നടത്തും. ഫാമിന് ചുറ്റുമുള്ള ഒരു കിലോമീറ്റർ രോഗബാധിത പ്രദേശമായും 10 കിലോമീറ്റർ ചുറ്റളവ് രോഗനിരീക്ഷണ മേഖലയായും പ്രഖ്യാപിച്ചിട്ടുണ്ട്.
Leave A Comment