അലക്ഷ്യമായി ഓടിച്ച ബൈക്കിന്റെ പിറകിൽ തട്ടി വീണു; ബസ് കയറി സ്കൂട്ടർ യാത്രക്കാരിക്ക് ദാരുണാന്ത്യം
കൊച്ചി: തൃപ്പൂണിത്തുറയിൽ ബൈക്കിടിച്ച് റോഡിൽ വീണ സ്കൂട്ടർ യാത്രക്കാരിക്ക് ദാരുണാന്ത്യം. പിറകിൽ വന്ന ബസ് യുവതിയുടെ ദേഹത്തിലൂടെ കയറിയിറങ്ങുകയായിരുന്നു. കൊച്ചി കടവന്ത്രയിലെ സിനർജി ഓഷ്യാനിക് സർവീസ് സെന്ററിലെ സീനിയർ എക്സിക്യൂട്ടീവ് കാവ്യ ധനേഷ് (30) ആണ് മരിച്ചത്.
ഇന്ന് രാവിലെ 9.40ന് തൃപ്പൂണിത്തുറ എസ്.എൻ ജംഗ്ഷനിൽ വെച്ചാണ് അപകടം നടന്നത്. യുവതിയുടെ പിറകിലായി വന്ന ബൈക്ക് യാത്രക്കാരൻ ഓവർടേക്ക് ചെയ്ത് കയറിയതിനു ശേഷം അലക്ഷ്യമായി 'യൂ ടേൺ' എടുക്കുകയായിരുന്നു. ഈ ബൈക്കിന്റെ പിറകിലിടിച്ച് യുവതി സ്കൂട്ടറിൽ നിന്നും റോഡിലേക്ക് തെറിച്ചു വീഴുകയും തൊട്ടുപിന്നാലെ വന്ന ബസ് യുവതിയുടെ ദേഹത്തിലൂടെ കയറിയിറങ്ങുകയായിരുന്നു.
ഗുരുതരമായി പരിക്കേറ്റ സ്കൂട്ടർ യാത്രക്കാരിയെ ഉടൻതന്നെ ആശുപത്രിയിലേക്ക് കൊണ്ടുപോയെങ്കിലും യാത്രാമധ്യേ മരണപ്പെടുകയായിരുന്നു. അതേസമയം അലക്ഷ്യമായി ബൈക്ക് ഓടിച്ച് അപകടമുണ്ടാക്കിയ ബൈക്ക് യാത്രക്കാരൻ ബൈക്ക് നിർത്താതെ സംഭവസ്ഥലത്തുനിന്നും രക്ഷപ്പെട്ടു.
Leave A Comment