എസ്എഫ്ഐയുടെ ആൾമാറാട്ടം: പ്രിൻസിപ്പലിനെ നീക്കി
തിരുവനന്തപുരം: കാട്ടാക്കട ക്രിസ്ത്യന്‍ കോളജിലെ എസ്എഫ്ഐ ആള്‍മാറാട്ടത്തില്‍ പ്രിന്‍സിപ്പല്‍ നീക്കി കേരള സർവകലാശാല. പ്രഫസർ ഷൈജുവിനെതിരെയാണ് നടപടി സ്വീകരിച്ചത്. കേരള സര്‍വകലാശാല വിസി ഡോ. മോഹന്‍ കുന്നമ്മേലാണ് ഇക്കാര്യം അറിയിച്ചത്.
സര്‍വകലാശാലയെ കബളിപ്പിച്ചതിന് ഷൈജുവിനെതിരെ പോലീസില്‍ പരാതിയും നൽകും. ആള്‍മാറാട്ടം നടത്തി യുയുസിയായ വിശാഖിനെതിരെയും പരാതി കൊടുക്കുമെന്നും വിസി പറഞ്ഞു.
ഷൈജുവിനെ അധ്യാപക സ്ഥാനത്തുനിന്ന് സസ്പെൻഡ് ചെയ്യാൻ മാനേജ്‌മെന്‍റിനോട് ആവശ്യപ്പെടും. തെരഞ്ഞെടുപ്പ് ചെലവുകൾ ഷൈജുവിൽനിന്ന് ഈടാക്കുമെന്നും പരീക്ഷ നടത്തിപ്പ് അടക്കമുള്ള ഉത്തരവാദിത്വങ്ങളിൽനിന്നു മാറ്റി നിർത്തുമെന്നും മോഹൻ പറഞ്ഞു
കൂടുതൽ കാര്യങ്ങൾ അന്വേഷിക്കാൻ സര്‍വകലാശാലക്ക് പരിമിതി ഉണ്ട്. പോലീസിന് ഇത് അന്വേഷിക്കാം. കാട്ടാക്കട കോളജ് തെരഞ്ഞെടുപ്പ് റദ്ദാക്കില്ല. യുയുസി ലിസ്റ്റ് ഒരാഴ്ചക്കകം നൽകണം എന്ന് ആവശ്യപ്പെട്ടിട്ടുണ്ട്.
അത് പരിശോധിച്ച് വെബ്‌സൈറ്റിൽ പ്രസിദ്ധീകരിക്കും. പരാതിയുണ്ടെങ്കിൽ അറിയിക്കാൻ അവസരം ഉണ്ടാകുമെന്നും അതിനു ശേഷമാകും യൂണിവേഴ്‌സിറ്റി യൂണിയൻ തെരഞ്ഞെടുപ്പെന്നും വിസി വ്യക്തമാക്കി.
Leave A Comment