വ്യാജ ബിരുദ സർട്ടിഫിക്കറ്റ്: കെഎസ്‌യു സംസ്ഥാന കൺവീനറെ ചോദ്യം ചെയ്ത് വിട്ടയച്ചു
തിരുവനന്തപുരം: വ്യാജ ബിരുദ സർട്ടിഫിക്കറ്റ് കേസിൽ കെഎസ്‌യു സംസ്ഥാന കൺവീനർ അൻസിൽ ജലീലിനെ ചോദ്യം ചെയ്ത് വിട്ടയച്ചു. ജൂലൈ ഏഴിന് വീണ്ടും ചോദ്യം ചെയ്യലിന് ഹാജരാകാൻ ആവശ്യപ്പെട്ടിട്ടുണ്ട്. എസ്എസ്എൽസി, പ്ലസ് ടു സർട്ടിഫിക്കറ്റുകളുമായി വേണം ചോദ്യം ചെയ്യലിന് ഹാജരാകാൻ.
തിരുവനന്തപുരം കന്‍റോൺമെന്‍റ് എസിപിയുടെ നേതൃത്വത്തിലായിരുന്നു ചോദ്യം ചെയ്യൽ. മൂന്നു മണിക്കൂറോളം ചോദ്യം ചെയ്യൽ നീണ്ടു. പ്രചരിക്കുന്ന ബിരുദ സർട്ടിഫിക്കറ്റ് താൻ നിർമിച്ചതല്ലെന്നാണ് അൻസിൽ ജലീൽ നൽകിയ മൊഴി.
രാവിലെ അഭിഭാഷകനൊപ്പമാണ് അൻസിൽ ജലീൽ കന്‍റോൺമെന്‍റ് പോലീസ് സ്റ്റേഷനിലെത്തിയത്. കേസിൽ രണ്ട് ആഴ്ചത്തേക്ക് അൻസിലിന് ഹൈക്കോടതി ഇടക്കാല ജാമ്യം അനുവദിച്ചിരുന്നു.
കേരള സർവകലാശാല രജിസ്ട്രാറാണ് അൻസിലിന്‍റെ സർട്ടിഫിക്കറ്റമായി ബന്ധപ്പെട്ട് കന്‍റോൺമെന്‍റ് പോലീസിൽ പരാതി നൽകിയത്.
Leave A Comment