പിണങ്ങിപ്പോയി എന്നത് മാധ്യമസൃഷ്ടി, വല്ലാത്തൊരു ചിത്രം ഉണ്ടാക്കാൻ ശ്രമം- മുഖ്യമന്ത്രി
കാസർകോട്: പൊതുപരിപാടിയിൽ പ്രസംഗം അവസാനിക്കും മുമ്പേ മൈക്ക് അനൗൺസ്മെന്റ് ഉണ്ടായതിൽ അസ്വസ്ഥനായി സ്റ്റേജ് വിട്ട് ഇറങ്ങിപ്പോയ സംഭവത്തിൽ വിശദീകരണവുമായി മുഖ്യമന്ത്രി പിണറായി വിജയൻ. പിണങ്ങിപ്പോയി എന്നത് മാധ്യമ സൃഷ്ടിയാണെന്നും പരിപാടിയിൽ നേരിട്ട ബുദ്ധിമുട്ട് ചൂണ്ടിക്കാട്ടി ഇറങ്ങിയതാണെന്നും അദ്ദേഹം കാസർകോട് നടന്ന മറ്റൊരു പൊതുപരിപാടിയിൽ വിശദീകരിച്ചു.
'നിറഞ്ഞ സന്തോഷത്തോടെ കെട്ടിടം ഉദ്ഘാടനം ചെയ്തതായി പ്രഖ്യാപിക്കുന്നു എന്ന് പറയുമ്പോൾ തന്നെ അനൗൺസർ അനൗൺസ് ചെയ്തു. ഞാൻ പിന്നെ പറയേണ്ട ഒരു വാചകം ഉണ്ട്, സ്നേഹാഭിവാദനങ്ങൾ എന്ന് പറഞ്ഞ് അവസാനിപ്പിക്കുന്നത്. അത് തീരുംമുമ്പ് തന്നെ അനൗൺസ്മെന്റ് നടത്തി. ഞാൻ പറഞ്ഞ് അവസാനിപ്പിക്കും മുമ്പേ എങ്ങനെയാണ് അനൗൺസ്മെന്റ് നടത്തിയത്. എന്റെ വാചകം തീരണ്ടെ. ഇത് കേൾക്കാതെ അയാൾ ആവേശത്തിൽ പറഞ്ഞു കൊണ്ടേയിരിക്കുകയാണ്. അപ്പോൾ ഞാൻ പറഞ്ഞു ചെവിട് കേൾക്കുന്നില്ലേ എന്ന്. ഇത് ചെയ്യാൻ പാടില്ലല്ലോ. ഞാൻ സംസാരിച്ചു കൊണ്ടിരിക്കുമ്പോൾ അത് അവസാനിപ്പിക്കണ്ടെ. എന്നിട്ടല്ലേ അനൗൺസ് ചെയ്യാൻ പാടുള്ളൂ. അത് പറഞ്ഞ് ഞാൻ ഇറങ്ങി പോന്നു. ഇതിനെയാണ് മുഖ്യമന്ത്രി പിണങ്ങിപ്പോയി എന്ന് ചാനലുകാർ വാർത്ത കൊടുത്തത്', പിണറായി വിജയൻ വിശദീകരിച്ചു.
'ഒരാൾക്ക് ശരിയല്ലാത്ത ഒരുകാര്യം ചെയ്താൽ അത് പറയേണ്ടത് എന്റെ ബാധ്യതയാണ്. അത് പറഞ്ഞു. നിങ്ങൾ പിണങ്ങിപ്പോയി എന്ന് പറഞ്ഞാൽ നാളെ അങ്ങനെ കണ്ടാൽ ഞാൻ പറയാതിരിക്കുമോ. അത് വീണ്ടും പറയും. അത് എന്റെ ബാധ്യതയായി കാണുന്ന ആളാണ് ഞാൻ. മാധ്യമങ്ങളുടെ ഉദ്ദേശം, എങ്ങനെയൊക്കെ വല്ലാത്തൊരു ചിത്രം ഉണ്ടാക്കാൻ പറ്റും എന്നതാണ്. അതുകൊണ്ടൊന്നും ആ ചിത്രം ജനങ്ങളിൽ ഉണ്ടാകില്ല എന്ന് മനസ്സിലാക്കണം', മുഖ്യമന്ത്രി വിശദീകരിച്ചു.
Leave A Comment