രാഹുൽ മാങ്കൂട്ടത്തിലിന് രണ്ട് കേസുകളിൽ ജാമ്യം
തിരുവനന്തപുരം: സെക്രട്ടേറിയറ്റ് മാർച്ചുമായി ബന്ധപ്പെട്ട് യൂത്ത് കോൺഗ്രസ് സംസ്ഥാന അധ്യക്ഷൻ രാഹുൽ മാങ്കൂട്ടത്തിലിനെതിരെ ഇന്നെടുത്ത രണ്ടു കേസിലും കോടതി ജാമ്യം അനുവദിച്ചു.
ആദ്യമെടുത്ത കേസിൽ ജാമ്യം ലഭിക്കാത്തതിനാൽ ജയിലിൽ തുടരേണ്ടി വരും. ജില്ലാ ജയിലിൽ വച്ച് കൻ്റോൺമെൻ്റ പോലീസാണ് രണ്ടു കേസിൽ ഇന്ന് അറസ്റ്റ് രേഖപ്പെടുത്തിയത്. ഈ കേസുകളിൽ റിമാൻഡ് ചെയ്യുന്നതിനായി രാഹുലിനെ മജിസ്ട്രേട്ട് കോടതിയിൽ ഹാജരാക്കിയിരുന്നു.
ഹാജരാക്കിയ സമയത്തു തന്നെ രാഹുലിൻ്റെ അഭിഭാഷകൻ ജാമ്യാപേക്ഷയും നൽകിയിരുന്നു. തുടർന്നാണ് കോടതി ജാമ്യം അനുവദിച്ചത്.
ഇതിനുപുറമേ മ്യൂസിയം പോലീസ് രജിസ്റ്റർ ചെയ്‌ത മറ്റൊരു കേസുമുണ്ട്. ഇതു ചീഫ് ജുഡീഷൽ മജിസ്ട്രേട്ട് കോടതിയാണു പരിഗണിക്കുന്നത്. ഇതിൽ പോലീസ് ഇതുവരെ പ്രൊഡക്ഷൻ വാറൻ്റ് ആവശ്യപ്പെട്ടിട്ടില്ല.
സെക്രട്ടേറിയറ്റ് മാർച്ചിലെ സംഘർഷങ്ങളുമായി ബന്ധപ്പെട്ട ആദ്യ കേസിൽ രാഹുലിനെ കഴിഞ്ഞ ചൊവ്വാഴ്‌ച പുലർച്ചെയാണ് വീട്ടിൽ നിന്ന് അറസ്റ്റു ചെയ്‌തത്. ഈ കേസിലെ ജാമ്യാപേക്ഷ തിരുവനന്തപുരം പ്രിൻസിപ്പൽ സെഷൻ സ് കോടതി ബുധനാഴ്‌ച പരിഗണിക്കും.
Leave A Comment