ഓഫീസിലെ ആരെയും സംശയമില്ല ; കത്ത് വിവാദത്തിൽ ആര്യ രാജേന്ദ്രൻ
തിരുവനന്തപുരം: തിരുവനന്തപുരം കോര്‍പ്പറേഷനിലെ നിയമനങ്ങളില്‍ ആളെ നിയമിക്കുന്നതിന് സിപിഎം ജില്ലാ സെക്രട്ടറിയോട് അഭ്യര്‍ഥിച്ച് കത്തെഴുതിയിട്ടില്ലെന്ന് മേയർ ആര്യാ രാജേന്ദ്രൻ. സംഭവത്തിൽ ക്ലിഫ്ഹൗസിലെത്തി മുഖ്യമന്ത്രിക്ക് പരാതി നൽകിയതിന് ശേഷം മുടവൻമുകളിലെ വീട്ടിൽ വച്ചു നടത്തിയ വാർത്താ സമ്മേളനത്തിൽ മേയർ ഇക്കാര്യം അറിയിച്ചത്.
കത്തിന്‍റെ ഉറവിടം അന്വേഷിക്കണമെന്ന് ആവശ്യപ്പെട്ട മേയർ, മാധ്യമപ്രവർത്തകർ കള്ളനെ പിടികൂടിയത് പോലെയാണ് തന്നെ പിന്തുടർന്നതെന്നും വിമർശിച്ചു. തന്‍റെ അറിവോ സമ്മതമോ അല്ലാതെയുള്ള കത്താണിത്. അത്തരമൊരു കത്ത് കൊടുക്കുന്ന ശീലം സിപിഎമ്മിനില്ല.
നേരിട്ടോ അല്ലാതെയോ കത്തിൽ ഒപ്പിട്ടിട്ടില്ല. നഗരസഭയ്ക്കും മേയർക്കുമെതിരെയുമായി ചെയ്തതാണോ ഇതെന്ന് സംശയമുണ്ട്. തെറ്റ് ചെയ്തവരെ കണ്ടെത്തണം. അത് തന്‍റെ കൂടെ ആവശ്യമാണ്.
സംഭവത്തിൽ മുഖ്യമന്ത്രിക്ക് പരാതി നൽകി. അന്വേഷണം നടത്തുമെന്ന് മുഖ്യമന്ത്രി അറിയിച്ചു. ലെറ്റർ പാഡ് വ്യാജമാണോയെന്ന് അന്വേഷിക്കണം. കത്ത് ആരുണ്ടാക്കി, ഷെയർ ചെയ്തു എന്ന് അന്വേഷിക്കണം. തന്‍റെ ഓഫീസിനെ സംശയമില്ലെന്നും മേയർ അറിയിച്ചു.
Leave A Comment