സ്കോച്ച് പുരസ്‌കാര ചുരുക്കപട്ടികയിൽ എറണാകുളം ജില്ലയുടെ പ്രത്യുഷ പദ്ധതി
എറണാകുളം : രാജ്യത്തെ വിവിധ ഭരണ നിർവഹണ സ്ഥാപനങ്ങൾ നടപ്പാക്കിയ എറ്റവും മികച്ച 25 പദ്ധതികളിൽ ഉൾപ്പെട്ട് എറണാകുളം ജില്ലയുടെ പ്രത്യുഷ പദ്ധതിയും. രാജ്യത്തിന്റെയും ജനങ്ങളുടെയും ഉന്നമനം ലക്ഷ്യമിട്ട് നടപ്പാക്കുന്ന പദ്ധതികൾക്ക് ലഭിക്കുന്ന സ്കോച്ച് പുരസ്‌കാര ചുരുക്ക പട്ടികയിലാണ് പ്രത്യുഷ പദ്ധതിയും ഉൾപ്പെട്ടിട്ടുള്ളത്. കേരളത്തിൽ നിന്ന് എറണാകുളം, കോട്ടയം, ആലപ്പുഴ ജില്ലകളാണ് പട്ടികയിലുള്ളത്.
പൊതു ജനങ്ങളിൽ നിന്നുള്ള വോട്ടിങ്ങിന്റെ അടിസ്ഥാനത്തിൽ ആണ് സ്കോച്ച് പുരസ്കാരത്തിന്റെ ചുരുക്കപ്പട്ടിക തയ്യാറാക്കുന്നത്. ഭരണ നിർവഹണത്തിൽ മുൻപന്തിയിൽ നിൽക്കുന്ന സർക്കാർ തല ഭരണനിർവഹണ കേന്ദ്രങ്ങൾക്കാണ് പുരസ്‌കാരം ലഭിക്കുന്നത്.
സാമ്പത്തികമായി പിന്നാക്കം നിൽക്കുന്ന സർക്കാർ സ്കൂളുകളിലെ എട്ടാം ക്ലാസ്സ്‌ വിദ്യാർത്ഥികൾക്ക് ദേശീയ സ്കോളർഷിപ് പരീക്ഷക്കാവശ്യമായ പരിശീലനം നൽകുക എന്ന ലക്ഷ്യത്തിൽ ആണ് പ്രത്യുഷ നടപ്പാക്കിയത്. പെട്രോനെറ്റ് എൽ എൻ ജി യുടെ സാമ്പത്തിക സഹായത്തിൽ എൻസ്ക്കൂൾ ലേണിംഗ് ആണ് വിദ്യാർത്ഥികൾക്ക് പരിശീലനം നൽകിയത്. പൂർണമായും ഓൺലൈൻ ആയാണ് പരിശീലനക്ലാസുകൾ നടത്തിയത്.
പ്രത്യുഷ പദ്ധതിയിൽ ഉൾപ്പെട്ട 83 വിദ്യാർത്ഥികൾ കഴിഞ്ഞ അധ്യയന വർഷം നാഷണൽ മീൻസ് കം മെറിറ്റ് സ്കോളർഷിപ്പിൽ വിജയം നേടി. ഓരോ വിദ്യാർത്ഥിക്കും 48000 രൂപ വീതം സ്കോളർഷിപ് ആയി ലഭിച്ചു. പ്രത്യുഷ പദ്ധതിയിൽ ഉൾപ്പെട്ട 260 വിദ്യാർത്ഥികൾ പരീക്ഷയിൽ യോഗ്യത നേടി. മുൻവർഷങ്ങളിൽ 100ൽ താഴെ പേർക്ക് മാത്രമാണ് പരീക്ഷയിൽ യോഗ്യത നേടാൻ സാധിച്ചത്.
ജില്ലയിലെ സർക്കാർ സ്കൂളുകളിലെ വിദ്യാർത്ഥികളായ വാർഷിക വരുമാനം ഒന്നര ലക്ഷം രൂപയിൽ താഴെയുള്ളവരെ ദേശീയ മത്സര പരീക്ഷയിൽ വിജയത്തിലെത്തിക്കുക എന്ന ലക്ഷ്യത്തിൽ ആണ് പ്രത്യുഷ പദ്ധതി ആവിഷ്കരിച്ചത്. പട്ടിക ജാതി, പട്ടിക വർഗ വിഭാഗങ്ങളിൽ പെട്ടവർക്ക് മുൻഗണന നൽകിയിരുന്നു.
കൂടുതൽ വിദ്യാർത്ഥികൾക്ക് സ്കോളർഷിപ് ലഭ്യമാക്കുക എന്ന ലക്ഷ്യത്തിൽ പ്രത്യുഷ 2.0 ജില്ലയിൽ ആരംഭിച്ചു കഴിഞ്ഞു. അർഹരായ കൂടുതൽ വിദ്യാർത്ഥികളെ പദ്ധതിയുടെ ഭാഗമാക്കാൻ സാധിക്കുമെന്നാണ് പ്രതീക്ഷ.
ആലപ്പുഴ ജില്ലയുടെ 'കരുതാം കുരുന്നിനെ', കോട്ടയം ജില്ലയുടെ അതി ദാരിദ്ര്യ ലഘൂകരണ പദ്ധതി എന്നിവയും ചുരുക്കപട്ടികയിൽ ഉൾപ്പെട്ടിട്ടുണ്ട്.
Leave A Comment