സിനിമാ സെറ്റിൽ ജീവനക്കാര്‍ക്ക് പോലീസ് ക്ലിയറന്‍സ് സംവിധാനമൊരുങ്ങുന്നു
കൊച്ചി: സിനിമാ സെറ്റുകളില്‍ സഹായികളായി എത്തുന്നവര്‍ക്ക് പോലീസ് ക്ലിയറന്‍സ് സര്‍ട്ടിഫിക്കറ്റ് സംവിധാനം ഏര്‍പ്പെടുത്താനൊരുങ്ങി പോലീസ്. കൊച്ചി സിറ്റി പോലീസ് കമ്മീഷണര്‍ നിര്‍മാതാക്കളുടെ സംഘടനയ്ക്ക് കൈമാറിയ കത്തിലാണ് ഇതു സംബന്ധിച്ച നിര്‍ദേശമുള്ളത്. താരങ്ങള്‍ക്കും സാങ്കേതിക പ്രവര്‍ത്തകര്‍ക്കുമൊപ്പം നിരവധി പേരാണ് സഹായികളായി സിനിമാ സെറ്റുകളിലെത്തുന്നത്.എന്നാല്‍ ഇവരുടെ പേരുവിവരങ്ങള്‍ ലഭ്യമായിരുന്നില്ല. ഈ സാഹചര്യത്തിലാണ് ക്രമിനല്‍, മയക്കുമരുന്ന് കേസുകളടക്കം ഇവരുടെ പേരില്‍ ഉണ്ടോയെന്ന് പരിശോധിച്ച് അതാത് സ്റ്റേഷനുകളില്‍ നിന്ന് പോലീസ് ക്ലിയറന്‍സ് സര്‍ട്ടിഫിക്കറ്റ് ഉറപ്പാക്കാന്‍ കമ്മീഷണറുടെ നിര്‍ദേശം.
നിര്‍മാതാക്കളുടെ സംഘടന ഇതിനെ സ്വാഗതം ചെയ്തു. കത്തിലെ നിര്‍ദേശം താരസംഘടനയായ അമ്മയെയും ഫെഫ്കയെയും അറിയിക്കും. കൊച്ചിയില്‍ 19ന് ചേരുന്ന പ്രൊഡ്യൂസേഴ്സ് അസോസിയേഷന്‍ ജനറല്‍ ബോഡി യോഗം നിര്‍ദേശം നടപ്പാക്കുന്നതുമായി ബന്ധപ്പെട്ട കാര്യങ്ങള്‍ ചര്‍ച്ചചെയ്യുമെന്ന് പ്രഡിസന്‍റ് എം. രഞ്ജിത് പറഞ്ഞു.
സിനിമാ ചിത്രീകരണവുമായി ബന്ധപ്പെട്ട് ലഹരി ആരോപണങ്ങള്‍ ഉള്‍പ്പെടെ ഉയര്‍ന്ന പശ്ചാത്തലത്തില്‍ ഷൂട്ടിംഗ് സെറ്റുകളില്‍ ഷാഡോ പോലീസിനെ രംഗത്തിറക്കുന്ന നടപടികളടക്കം പോലീസ് സ്വീകരിച്ചിരുന്നു. ഇതിനു പിന്നാലെയാണ് ഈ നടപടി.
Leave A Comment