രാഹുൽ തന്നെ അധ്യക്ഷനാകണം; പ്രമേയം പാസാക്കി ഛത്തീസ്ഗഢും
റായ്പുര്‍: കോണ്‍ഗ്രസ് അധ്യക്ഷനായി രാഹുല്‍ ഗാന്ധിയെ തിരഞ്ഞെടുക്കണമെന്ന് രാജസ്ഥാന്‍ കോണ്‍ഗ്രസ് പ്രമേയം പാസാക്കിയതിനു പിന്നാലെ സമാന നീക്കവുമായി ഛത്തീസ്ഗഢ് കോണ്‍ഗ്രസും. പി.എല്‍. പുനിയയുടെ നേതൃത്വത്തില്‍ റായ്പുരിലെ രാജീവ് ഭവനില്‍ മുഖ്യമന്ത്രി ഭൂപേഷ് ബഘേലും
മന്ത്രിമാരും അടക്കമുള്ള നേതാക്കള്‍ പങ്കെടുത്ത നടന്ന യോഗത്തിലാണ് പ്രമേയം പാസ്സാക്കിയത്.
രണ്ട് പ്രമേയങ്ങളാണ് യോഗത്തില്‍ ഏകകണ്ഠമായി പാസ്സാക്കിയതെന്ന് പുനിയ മാധ്യമങ്ങളോട് പറഞ്ഞു. സംസ്ഥാന പ്രസിഡന്റിനെയും ട്രഷററെയും നിയമിക്കണമെന്ന് അധ്യക്ഷ സോണിയാ ഗാന്ധിയോട് ആവശ്യപ്പെടുന്നതാണ് ഒരു പ്രമേയം. രാഹുള്‍ ഗാന്ധിയെ ദേശീയ അധ്യക്ഷനാക്കണമെന്ന് ആവശ്യപ്പെട്ടുകൊണ്ടുള്ളതായിരുന്നു മറ്റൊരു പ്രമേയം, അദ്ദേഹം വ്യക്തമാക്കി.
ശനിയാഴ്ചയാണ്‌ രാഹുല്‍ ഗാന്ധിയെ പാര്‍ട്ടി അധ്യക്ഷനായി നിയമിക്കാന്‍ രാജസ്ഥാന്‍ മുഖ്യമന്ത്രി അശോക് ഗെഹ്‌ലോത്തിന്റെ നേതൃത്വത്തില്‍ പ്രമേയം പാസ്സാക്കിയത്. കഴിഞ്ഞ കുറച്ച് മാസങ്ങളായി പല സംസ്ഥാനങ്ങളും കോണ്‍ഗ്രസ് സംഘടനകളും രാഹുല്‍ ഗാന്ധിയെ പാര്‍ട്ടി അധ്യക്ഷനാക്കാനുള്ള പ്രമേയം പാസാക്കിയിരുന്നു. പുതുച്ചേരിയും ഹിമാചല്‍ പ്രദേശും അടുത്തിടെയാണ് പ്രമേയം പാസാക്കിയത്. കോണ്‍ഗ്രസ് അധ്യക്ഷ സ്ഥാനത്തേക്കുള്ള നാമനിര്‍ദേശം സെപ്തംബര്‍ 24-ന് ആരംഭിക്കാനിരിക്കെയാണ് വിവിധ സംസ്ഥാന ഘടകങ്ങളുടെ ഇത്തരമൊരു നടപടി.
Leave A Comment