കെ എസ് ഇ ബി ജീവനക്കാര്‍ ഇന്ന് പണിമുടക്കും
തിരുവനന്തപുരം: കേന്ദ്ര സര്‍ക്കാരിന്‍റെ വൈദ്യുതി ഭേദഗതി തീരുമാനത്തില്‍ പ്രതിഷേധിച്ച് കെഎസ്ഇബി ജീവനക്കാര്‍ തിങ്കളാഴ്ച പണിമുടക്കും. ഭേദഗതിയില്‍ പ്രതിഷേധിച്ച് നടക്കുന്ന രാജ്യവ്യാപക പണിമുടക്കിന്‍റെ ഭാഗമായിട്ടാണ് സംയുക്ത സമരസമിതിയുടെ നേതൃത്വത്തില്‍ കെഎസ്ഇബി ജീവനക്കാര്‍ പണിമുടക്കുന്നത്.
വൈദ്യുതി ഭേദഗതി ബില്‍ പാര്‍ലമെന്‍റില്‍ അവതരിപ്പിക്കുന്ന ഇന്ന് ജോലി ബഹിഷ്‌കരിച്ച് തെരുവിലിറങ്ങാനാണ് സമരസമിതിയുടെ തീരുമാനം. എന്നാല്‍ പണിമുടക്കില്‍ നിന്നും അവശ്യസേവനങ്ങളെ ഒഴിവാക്കിയിട്ടുണ്ട്.
ഒരു പ്രദേശത്ത് ഒന്നിലധികം വിതരണ ലൈസന്‍സികള്‍ക്ക് പ്രവര്‍ത്തനാനുമതി നല്‍കുന്നതാണ് കേന്ദ്രത്തിന്‍റെ സുപ്രധാന ഭേദഗതി. ഇത് നിലവില്‍ വന്നാല്‍ സ്വകാര്യ കമ്പനികള്‍ക്ക് കേരളത്തിന്‍റെ വൈദ്യുതി മേഖലയിലേക്ക് കടന്നു വരാന്‍ കഴിയും.
ഇതോടെ ക്രോസ് സബ്‌സിഡിയും കര്‍ഷകര്‍ക്കും മറ്റുള്ളവര്‍ക്കും കുറഞ്ഞ നിരക്കില്‍ വൈദ്യുതി നല്‍കുന്നതും ഇല്ലാതാകും. ഒരു മെഗാ വോള്‍ട്ടില്‍ കൂടുതല്‍ ഉപയോഗിക്കുന്ന ഉപഭോക്താകള്‍ക്ക് ഓപ്പണ്‍ ആക്‌സിസ് വഴി വൈദ്യുതി വാങ്ങാന്‍ അനുവദിക്കുന്നത് മേഖലയെ തകര്‍ക്കുമെന്നും കരുതുന്നു.
നിയമഭേദഗതിയില്‍ നിന്ന് പിന്മാറണമെന്ന് കേന്ദ്രത്തോട് സംസ്ഥാന വൈദ്യുതി മന്ത്രി കെ കൃഷ്ണന്‍കുട്ടി ആവശ്യപ്പെട്ടു.
Leave A Comment