ചാലക്കുടി: അതിരപ്പിള്ളിയിലെ ആദിവാസി ഊരില്‍ പ്രായപൂര്‍ത്തിയാവാത്ത പെണ്‍കുട്ടിയെ മദ്യംനല്‍കി പീഡിപ്പിച്ചെന്നു പരാതി. വനിതാദിനമായ ഇന്നലെ ഉച്ചയ്ക്ക് രണ്ടരയോടെയാണ് സംഭവം. 16 വയസ്സുകാരിയെ മൂന്നുപേര്‍ ചേര്‍ന്നാണ് പീഡിപ്പിച്ചതെന്നും പ്രതികളില്‍ ഒരാളെ പെണ്‍കുട്ടി തിരിച്ചറിഞ്ഞതായും റിപ്പോര്‍ട്ടുകളുണ്ട്.

പെണ്‍കുട്ടിയുടെ ഊരിനടുത്തുള്ള പാറയ്ക്കു സമീപത്തു വച്ചാണ് പീഡനം. കുട്ടിക്ക് പരിചയമുള്ള ഒരാള്‍ പാറയുടെ അടുത്തേക്ക് കൊണ്ടുപോയി ബലമായി മദ്യം നല്‍കിയ ശേഷം പീഡിപ്പിച്ചെന്നാണ് പരാതി. കൂടെയുണ്ടായിരുന്ന രണ്ടുപേരും പീഡിപ്പിച്ചിട്ടുണ്ട്. പെണ്‍കുട്ടിയെ കാണാതായതിനാല്‍ രക്ഷിതാക്കളും ബന്ധുക്കളും നടത്തിയ തിരച്ചിലിലാണ് പൂര്‍ണ്ണ നഗ്‌നയായി അവശനിലയില്‍ കുട്ടിയെ കണ്ടെത്തിയത്. തുടര്‍ന്ന് ഇവര്‍ മലക്കപ്പാറ പോലീസിനെ വിവരമറിയിച്ചു. ആംബുലന്‍സ് എത്തിച്ചാണ് ചാലക്കുടി താലൂക്ക് ആശുപത്രിയിലേക്ക് മാറ്റിയത്.