ബിജെപിയുടെ അഴിമതി ചോദ്യം ചെയ്തത് പാർട്ടി വിരുദ്ധമോ; കോൺഗ്രസ് നേതൃത്വത്തോട് സച്ചിൻ
ന്യൂഡൽഹി: കോൺഗ്രസ് നേതൃത്വത്തെ വിമർശിച്ച് രാജസ്ഥാനിലെ കോണ്‍ഗ്രസ് നേതാവ് സച്ചിൻ പൈലറ്റ്. ബിജെപിയുടെ അഴിമതി ചോദ്യംചെയ്യുന്നത് എങ്ങനെ പാർട്ടി വിരുദ്ധമാകുമെന്നും സച്ചിൻ ചോദിച്ചു.
ബിജെപിക്കെതിരേ നിരാഹാര സമരം സംഘടിപ്പിച്ചതിന് നേതൃത്വം വിശദീകരണം തേടിയത് തന്നെ അത്ഭുതപ്പെടുത്തിയെന്നും സച്ചിൻ പറഞ്ഞു. ഈ മാസം 11ന് ജയ്പൂരിലെ രക്തസാക്ഷി സ്മാരകത്തിലാണ് (ഷഹീദ് സ്ഥാൻ) സച്ചിൻ ഏകദിന നിരാഹാരം നടത്തിയത്.
മഹാത്മാ ഗാന്ധിയുടെ ചിത്രം പശ്ചാത്തലമാക്കിയ നിരാഹാര വേദിയിൽ കോണ്‍ഗ്രസിന്‍റെ പാർട്ടി ചിഹ്നമായ കൈപ്പത്തിയോ മറ്റു സൂചകങ്ങളോ ഇല്ലായിരുന്നു. ബിജെപി ഭരിച്ചപ്പോൾ രാജസ്ഥാനിൽ നടത്തിയ അഴിമതികളെക്കുറിച്ച് ഗെഹ്ലോട്ട് സർക്കാർ അന്വേഷണം നടത്തുന്നില്ല എന്നാരോപിച്ചായിരുന്നു സച്ചിന്‍റെ നിരാഹാരം.
അതേസമയം, പാർട്ടിവിരുദ്ധമാകുമെന്ന താക്കീത് ലംഘിച്ച് നിരാഹാരം ഇരുന്നതിൽ അശോക് ഗെഹ്ലോട്ടും അനുയായികളും പ്രതിഷേധത്തിലാണ്. സച്ചിനെതിരേ കടുത്ത നടപടിവേണമെന്നാണ് ഇവർ ആവശ്യപ്പെടുന്നത്.
Leave A Comment