രാഹുലിന്‍റെ മാനസിക നില തെറ്റിയെന്ന് ബിജെപി
ന്യൂഡൽഹി: പ്രധാനമന്ത്രിക്കെതിരായ രാഹുൽ ഗാന്ധിയുടെ വിമർശനത്തിൽ മറുപടിയുമായി ബിജെപി. രാഹുൽ ഗാന്ധിയുടെ മാനസിക നില തെറ്റിയെന്ന് പാർലമെന്‍ററികാര്യമന്ത്രി പ്രഹ്ലാദ് ജോഷി പറഞ്ഞു. പ്രധാനമന്ത്രിയുടെ പ്രസംഗം കേൾക്കാതെയാണ് രാഹുൽ പറയുന്നതെന്നും അദ്ദേഹം വിമർശിച്ചു.മണിപ്പുരിലെ അക്രമത്തെക്കുറിച്ച് ബിജെപി നേതൃത്വത്തിലുള്ള കേന്ദ്രം ചർച്ചയ്ക്ക് സമ്മതിക്കുമെന്ന് രാഹുൽ കരുതിയിരുന്നില്ല. ഈ വിഷയത്തിൽ രാഹുലിന്‍റെ മാനസിക സന്തുലിതാവസ്ഥ നഷ്ടപ്പെട്ടുവെന്നും പ്രതിപക്ഷത്തെ രൂക്ഷമായി വിമർശിച്ച് കേന്ദ്രമന്ത്രി പ്രഹ്ലാദ് ജോഷി പറഞ്ഞു.
മണിപ്പൂരിലെ ചർച്ചയ്ക്ക് ഞങ്ങൾ സമ്മതിക്കുമെന്ന് കോൺഗ്രസും മറ്റ് പ്രതിപക്ഷ പാർട്ടികളും ഒരിക്കലും കരുതിയിരുന്നില്ല. പ്രധാനമന്ത്രി നരേന്ദ്ര മോദിയും കേന്ദ്ര ആഭ്യന്തരമന്ത്രി അമിത് ഷായും പറഞ്ഞതുപോലെ ഈ വിഷയത്തിൽ ശ്രദ്ധ പുലർത്തണമെന്ന് ജോഷി പറഞ്ഞു.
രാഹുൽ ഗാന്ധിയുടെ മാനസിക സന്തുലിതാവസ്ഥ നഷ്ടപ്പെട്ടതായി ഞാൻ കരുതുന്നു, അത് അങ്ങനെയാണ് കാണപ്പെടുന്നത്. രാഹുൽ മറുപടി കേട്ടില്ല. അദ്ദേഹം സഭയിൽ വന്നില്ല. ഗ്രാൻഡ് ഓൾഡ് പാർട്ടി എന്ന് വിളിക്കപ്പെടുന്നവർ നിരുത്തരവാദപരമായി പെരുമാറുന്നത് വളരെ ദൗർഭാഗ്യകരമാണെന്നും പ്രഹ്ലാദ് ജോഷി കൂട്ടിച്ചേർത്തു.
മണിപ്പുർ കലാപത്തിൽ മോദിക്കെതിരേ രൂക്ഷ വിമർശനവുമായി രാഹുൽ ഗാന്ധി രംഗത്തെത്തിയിരുന്നു. അവിശ്വാസ പ്രമേയ ചർച്ചയിൽ സഭയിൽ രണ്ടുമണിക്കൂറിലധികം മോദി സംസാരിച്ചു. എന്നാൽ മണിപ്പുരിനെക്കുറിച്ച് പറഞ്ഞത് രണ്ടുമിനിറ്റ് മാത്രമാണെന്നും രാഹുൽ ഡൽഹിയിൽ നടത്തിയ വാർത്താസമ്മേളനത്തിൽ വിമർശിച്ചു.
Leave A Comment