അച്ചുവിനെതിരായ സൈബര്‍ അധിക്ഷേപം: നന്ദകുമാറിനെ ചോദ്യംചെയ്ത് വിട്ടയച്ചു
തിരുവനന്തപുരം: മുന്‍ മുഖ്യമന്ത്രി ഉമ്മന്‍ ചാണ്ടിയുടെ മകള്‍ അച്ചു ഉമ്മനെ സൈബര്‍ അധിക്ഷേപം നടത്തിയെന്ന കേസില്‍ സെക്രട്ടറിയേറ്റിലെ മുന്‍ അഡീഷണല്‍ സെക്രട്ടറി നന്ദകുമാര്‍ കൊളത്താപ്പിള്ളിയെ പോലീസ് ചോദ്യം ചെയ്ത്‌ വിട്ടയച്ചു. പൂജപ്പുര പോലീസ് ആണ് ബുധനാഴ്ച ഹാജരാകാന്‍ നോട്ടീസ് നല്‍കിയിരുന്നത്.പോലീസ് നന്ദകുമാറിന്‍റെ ഫോണ്‍ കസ്റ്റഡിയിലെടുത്തു. എന്നാല്‍ ആദ്യം ഹാജരാക്കിയത് ഫേസ്ബുക്ക് ഉപേയാഗിക്കാത്ത ഫോണ്‍ ആയിരുന്നു. പിന്നീട് യഥാര്‍ഥ ഫോണ്‍ നന്ദകുമാറിന്‍റെ സുഹൃത്ത് ഹാജരാക്കി. വിട്ടയച്ചെങ്കിലും വീണ്ടും ഹാജരാകാന്‍ നോട്ടീസ് നല്‍കിയതായാണ് വിവരം.
നേരത്തെ, സൈബര്‍ അധിക്ഷേപത്തിനെതിരേ പോലീസിനും വനിതാ കമ്മീഷനും സൈബര്‍ സെല്ലിനും അച്ചു ഉമ്മന്‍ പരാതി നല്‍കിയിയിരുന്നു. സ്‌ക്രീന്‍ ഷോട്ടുകള്‍ സഹിതമായിരുന്നു പരാതി. അച്ചുവിന്‍റെ പരാതിയില്‍ പോലീസ് കേസെടുത്ത് മൊഴി രേഖപ്പെടുത്തിയിരുന്നു.
അച്ചു ഉമ്മന്‍ പരാതി നല്‍കിയതിന് പിന്നാലെ നന്ദകുമാര്‍ ഖേദപ്രകടനം നടത്തിയിരുന്നു. സ്ത്രീത്വത്തെ അപമാനിക്കാന്‍ താന്‍ ശ്രമിച്ചിട്ടില്ലെന്നും അറിയാതെ സംഭവിച്ചു പോയ തെറ്റിന് നിരുപാധികം മാപ്പ് ചോദിക്കുന്നുവെന്നുമായിരുന്നു നന്ദകുമാറിന്‍റെ പോസ്റ്റ്.
ഇതിനിടെ സെക്രട്ടറിയേറ്റിലെ മുന്‍ ഇടതുസംഘടനാ നേതാവായ നന്ദകുമാറിന് ഐഎച്ച്ആര്‍ഡിയില്‍ അഡ്മിനിസ്ട്രേറ്റീവ് ഓഫീസറായി പുനര്‍നിയമനം നല്‍കിയിരുന്നു.
Leave A Comment