പാട്ടുകാരനാവുക എന്നതായിരുന്നുഎന്റെ ആഗ്രഹം.സ്കൂള്‍ കാലഘട്ടം മുതലേ ശാസ്ത്രീയ സംഗീതത്തിലായിരുന്നു  ഫോക്കസ്. എന്റെ അച്ഛനും അതായിരുന്നു ഇഷ്ടം. ഏഴാം തരത്തില്‍ പഠിക്കുമ്പോള്‍ മറക്കാനാവാത്ത ഒരനുഭവം ഉണ്ടായി. സംസ്ഥാന സ്കൂള്‍ യുവജനോത്സവത്തില്‍ തിരുവനന്തപുരം ജില്ലയില്‍ ലളിത ഗാനത്തിന് ഒന്നാം സമ്മാനം ലഭിച്ചു. അതിനു പുറകിലൊരു കഥയുണ്ട്. മത്സരം തുടങ്ങി സ്റ്റേജില്‍ കയറി ചുറ്റും നോക്കി. സദസ്സിന് മുമ്പില്‍ വിധികര്‍ത്താക്കള്‍ ഇരിക്കുന്നു. അതില്‍ വളരെ പ്രായമായ ഒരു വ്യക്തിയും.ഞാന്‍  പാട്ടിന്റെ ഹമ്മിംഗ് തുടങ്ങി പെട്ടെന്ന് തൊണ്ടക്ക് ഇടര്‍ച്ച . ആത്മവിശ്വാസം അതോടെ പമ്പ  കടന്നു.എന്നാല്‍ തോറ്റു പിന്മാറാന്‍ മനസ്സ് തയാറായതുമില്ല. വീണ്ടും ആദ്യം മുതല്‍ പാടി.

 പാടി തീര്‍ന്നതും സ്റ്റേജില്‍ നിന്ന് ഇറങ്ങി നേരെ പോയി  കാറില്‍ കിടന്നു. സമ്മാനം കിട്ടില്ലെന്ന് ഉറപ്പായിരുന്നു. അമ്മ ആശ്വസിപ്പിക്കാന്‍   നോക്കുന്നുണ്ട്. എന്നിട്ടും ഒരു ഫലവും ഉണ്ടായില്ല. ഒടുവിലതാ മൈക്കിലൂടെ ഫലപ്രഖ്യാപനം ഒന്നാം സമ്മാനം എം.ജയചന്ദ്രന്‍. അന്ന് മനസ്സിലാക്കി ആത്മ വിശ്വാസമാണ് നമ്മുടെ ഏറ്റവും വലിയ സുഹൃത്ത്. അത് വീണ്ടെടുത്ത് വീണ്ടും പാടിയത് കൊണ്ടാണല്ലോ സമ്മാനം ലഭിച്ചത്. 

സംസ്ഥാന തല മത്സരത്തിന് പാടാന്‍ എത്തിയപ്പോള്‍ പ്രായമേറിയ ആ വിധി കര്‍ത്താവ്‌ അവിടെയും ഉണ്ടായിരുന്നു. അദ്ദേഹം എന്നെ കണ്ടപ്പോള്‍ പറഞ്ഞു. 'അന്ന് ഒന്നാം സമ്മാനം തന്നത് ഒരു തെറ്റ് പറ്റിയെന്നറിഞ്ഞിട്ടും വീണ്ടും പാടാന്‍ കാണിച്ച ആത്മവിശ്വാസത്തിനാണ് '.

ആ വ്യക്തിയുടെ വാക്കുകള്‍ കുറച്ചൊന്നുമല്ല എനിക്ക് പ്രചോദനമായത്. പിന്നീടാണ് ആ മഹാമനുഷ്യന്‍ ആരെന്ന് അറിയുന്നത്- ഗായിക കെ.എസ് ചിത്രയുടെ അച്ഛന്‍.

അന്ന് പങ്കെടുത്ത ക്വയര്‍ ഒരുപാട് പേരുമായി കൂടാനും ധാരാളം ശ്രദ്ധ കിട്ടാനും സഹായിച്ചു.  ക്വയര്‍ സംഗീതത്തില്‍ ഉണ്ടായ സൗഹൃദങ്ങള്‍ ഇപ്പോഴും എന്‍റെ ഇടത്തും വലത്തുമായുണ്ട്.

എന്നെ മുന്നോട്ട് വഴി നടക്കാന്‍ പ്രേരിപ്പിച്ച് കൂടെ നിന്ന ആ നാല് പേരാണ് രാകേഷ്, അലോഷ്യസ്, ആശിഫ്, ജോണ്‍ മത്തായി. എന്‍റെ വഴിത്തിരിവില്‍ എന്റെ കൂടെ എന്നും ചേര്‍ന്നു നില്‍ക്കുന്നവര്‍.

                                                    തയ്യാറാക്കിയത് :ഉമ ആനന്ദ്