ആദിവാസി യുവാവിന്‍റെ മരണം: പോലീസ് റിപ്പോര്‍ട്ട് തള്ളി എസ്‌സി-എസ്ടി കമ്മീഷന്‍
കോഴിക്കോട്: മെഡിക്കല്‍ കോളജ് പരിസരത്ത് ആള്‍ക്കൂട്ട വിചാരണയ്ക്ക് വിധേയനായ ആദിവാസി യുവാവ് വിശ്വനാഥന്‍റെ മരണത്തില്‍ പോലീസ് റിപ്പോര്‍ട്ട് തള്ളി എസ്‌സി-എസ്ടി കമ്മീഷന്‍. സംഭവത്തില്‍ എസ്‌സി-എസ്ടി പീഡനനിരോധന നിയമപ്രകാരം തന്നെ കേസെടുക്കണമെന്ന് കമ്മീഷന്‍ ചെയര്‍മാന്‍ ബി.എസ്.മാവോജി നിര്‍ദേശിച്ചു.
ഒരാള്‍ വെറുതേ ആത്മഹത്യ ചെയ്യില്ല. വിശ്വനാഥന് മാനസിക സംഘര്‍ഷം ഉണ്ടാക്കുന്ന എന്തോ കാര്യം അവിടെ സംഭവിച്ചിട്ടുണ്ട്. അസ്വാഭാവിക മരണത്തിന് മാത്രമായി കേസെടുക്കുന്നത് ശരിയല്ലെന്നും കമ്മീഷന്‍ പറഞ്ഞു.
എക്‌സിക്യുട്ടിവ് മജിസ്‌ട്രേറ്റ് ഇന്‍ക്വസ്റ്റ് നടത്താത്തത് വീഴ്ചയാണെന്ന് കമ്മീഷന്‍ നിരീക്ഷിച്ചു. നാല് ദിവസത്തിനകം പുതിയ റിപ്പോര്‍ട്ട് സമര്‍പ്പിക്കണമെന്നും കമ്മീഷന്‍ നിര്‍ദേശിച്ചു.
നിറവും വസ്ത്രവുമൊക്കെ കണ്ട് ആളുകള്‍ ഇല്ലാത്ത കുറ്റം അയാളുടെമേല്‍ ആരോപിച്ച് കാണും. കറുത്തവരെ കാണുമ്പോഴുള്ള മനോഭാവത്തില്‍ മാറ്റമുണ്ടാകണമെന്നും കമ്മീഷന്‍ വ്യക്തമാക്കി.
Leave A Comment