ചേലക്കര: സഹകരണബാങ്ക് നിയമനവുമായി ബന്ധപ്പെട്ട് പണം ആവശ്യപ്പെടുന്ന കോൺഗ്രസ് നേതാക്കളുടെ ശബ്ദരേഖ പുറത്തുവന്നതിന് പിന്നാലെ ചേലക്കരയിൽ കോൺഗ്രസ് ഭരിക്കുന്ന മറ്റ് സഹകരണസംഘങ്ങൾക്കെതിരെയും പരാതി. പാഞ്ഞാൾ മൾട്ടി പർപ്പസ് സഹകരണസംഘത്തിലെ നിയമനത്തിനെതിരെ യൂത്ത് കോൺഗ്രസ് രം​ഗത്തെത്തി. യൂത്ത് കോൺഗ്രസ് പ്രവർത്തകരെ തഴഞ്ഞ് ഡിവൈഎഫ്ഐ നേതാവിന്റെ ഭാര്യക്ക് ജോലി നൽകി. യൂത്ത് കോൺഗ്രസ് പാഞ്ഞാൾ മണ്ഡലം പ്രസിഡന്റ്‌ അഖിലാഷിന് ജോലി നൽകണമെന്ന പാർട്ടി തീരുമാനം അവഗണിച്ചാണ് ഡിവൈഎഫ്ഐ നേതാവിന്റെ ഭാര്യക്ക് നൽകിയത്.

ഡിസിസി സെക്രട്ടറി ജോണി മണിച്ചിറയാണ് സംഘം പ്രസിഡന്റ്. നിയമനങ്ങളിൽ പാർട്ടി തല അന്വേഷണം വേണം. ലക്ഷങ്ങൾ കോഴ വാങ്ങിയാണ് നിയമനം നടത്തുന്നത്. ജോണി മണിച്ചിറക്കെതിരെയും ഭരണസമിതിക്കെതിരെയും നടപടി വേണമെന്ന് യൂത്ത് കോൺഗ്രസ് ആവശ്യപ്പെട്ടു.യൂത്ത് കോൺഗ്രസ് നിയോജകമണ്ഡലം കമ്മിറ്റി ഭാരവാഹികളും 9 മണ്ഡലം കമ്മിറ്റി ഭാരവാഹികളും പരാതിയിൽ ഒപ്പുവച്ചു.