ദൃശ്യവിസ്മയം തുടരുന്നു: വർണ്ണക്കുടയ്ക്ക് കീഴിൽ ആദരമേറ്റ് വാങ്ങി പ്രതിഭകൾ
ഇരിങ്ങാലക്കുടയുടെ കലാ-കായിക-കാർഷിക മഹോത്സവമായ വർണ്ണക്കുടയിൽ രണ്ടാം നാൾ ശ്രദ്ധേയമായി സമാദരണ സമ്മേളനവും നൃത്തസംഗീത വിരുന്നും. മുൻസിപ്പൽ മൈതാനത്തിൽ നടന്ന സമാദരണ സമ്മേളനം മുതിർന്ന ക്ലാസിക്കൽ കലാകാരൻമാർ ചേർന്ന് ഉദ്ഘാടനം ചെയ്തു. ഉന്നത വിദ്യാഭ്യാസ സാമൂഹ്യ നീതി വകുപ്പ് മന്ത്രി ഡോ.ആർ ബിന്ദു അധ്യക്ഷത വഹിച്ചു.
ഒരുപാട് ഹൃദയങ്ങളെ കൂട്ടി യോജിപ്പിക്കാൻ കലയെ ഉപയോഗപ്പെടുത്തിയ കലാകാരൻമാരെ ആദരിക്കുകയാണ് ഈ സ്നേഹ സന്ധ്യയിലൂടെ എന്ന് മന്ത്രി പറഞ്ഞു. ഒരു നാടിന്റെ മുഴുവൻ സ്നേഹാദരമാണിതെന്നും മന്ത്രി കൂട്ടിച്ചേർത്തു.
ക്ലാസിക്കൽ കലകളിൽ പ്രാഗത്ഭ്യം കൈവരിച്ച മുതിർന്ന കലാകാരൻമാരായ കലാനിലയം രാഘവൻ ആശാൻ, സദനം കഷ്ണൻ കുട്ടി ആശാൻ, കലാനിലയം പരമേശ്വരൻ ആശാൻ, വേണുജി, കലാനിലയം ഉണ്ണികൃഷ്ണൻ, അമ്മന്നൂർ കുട്ടൻ ചാക്യാർ, കലാനിലയം ഗോപി ആശാൻ, കലാമണ്ഡലം നാരായണൻ എമ്പാന്തിരി എന്നിവരെ യോഗത്തിൽ മന്ത്രി ആദരിച്ചു.
വർണ്ണക്കുട അനുബന്ധ പരിപാടികളിലെ വിജയികൾക്ക് സമ്മാനദാനം നടത്തി. തുടർന്ന് കേരള കലാമണ്ഡലം അവതരിപ്പിച്ച ഫ്യൂഷൻ നൃത്തവും ആൽമരം മ്യൂസിക് ബാൻഡും അരങ്ങേറി.
എംഎൽഎമാരായ കെ കെ രാമചന്ദ്രൻ, ഇ ടി ടൈസൻ മാസ്റ്റർ എന്നിവർ മുഖ്യാതിഥികളായിരുന്നു. ജില്ലാ കലക്ടർ ഹരിത വി കുമാർ മുഖ്യപ്രഭാഷണം നടത്തി. മാള ബ്ലോക്ക് പഞ്ചായത്ത് പ്രസിഡന്റ് സന്ധ്യാ നൈസൻ, ഇരിങ്ങാലക്കുട നഗരസഭ സ്റ്റാന്റിംഗ് കമ്മിറ്റി ചെയർപേഴ്സൺ അഡ്വ. ജിഷ ജോബി എന്നിവർ പങ്കെടുത്തു. ബ്ലോക്ക് ഗ്രാമപഞ്ചായത്ത് വൈസ് പ്രസിഡന്റുമാരും സാംസ്കാരിക കായിക രംഗത്തെ പ്രമുഖരും വേദിയിൽ സന്നിഹിതരായിരുന്നു.
Leave A Comment