ബെംഗളൂരു: കർണാടകയിൽ സിദ്ധരാമയ്യ മുഖ്യമന്ത്രിയായേക്കുമെന്ന് റിപ്പോർട്ട്. ടേം വ്യവസ്ഥയിൽ മുഖ്യമന്ത്രി സ്ഥാനം ഡി.കെ ശിവകുമാറിനും സിദ്ധരാമയ്യയ്ക്കും നൽകാനാണ് ധാരണയായിരിക്കുന്നതെന്നാണ് സൂചന. ആദ്യം ടേമിൽ രണ്ട് വർഷം സിദ്ധരാമയ്യയ്ക്കും രണ്ടാം ടേമിൽ മൂന്ന് വർഷം ഡി.കെ. ശിവകുമാറിനും മുഖ്യമന്ത്രി സ്ഥാനം നൽകിയേക്കും. ഇരു നേതാക്കളുമായി ഖാർഗെ കൂടിക്കാഴ്ച നടത്തി. സോണിയാ ഗാന്ധിയും രാഹുൽ ഗാന്ധിയുമായി ഖാർഗെ ചർച്ച നടത്തിയശേഷം ഔദ്യോഗിക പ്രഖ്യാപനം നാളെ ഉണ്ടായേക്കും.

ഉപമുഖ്യമന്ത്രിപദവും ആഭ്യന്തരവകുപ്പും വേണമെന്ന ആവശ്യമാണ് ഡി.കെ. ശിവകുമാർ കോൺഗ്രസ് നേതൃത്വത്തിന് മുന്നിൽ വെച്ചതെന്നാണ് ലഭിക്കുന്ന വിവരം. കൂടെനിൽക്കുന്ന നേതാക്കൾക്ക് പ്രധാനപ്പെട്ട വകുപ്പുകൾ മന്ത്രിസഭയിൽ നൽകണമെന്നും ടേം സംബന്ധിച്ച് കൃത്യമായ ഉറപ്പ് വേണമെന്നും ഡി.കെ. കോൺഗ്രസ് അധ്യക്ഷൻ മല്ലികാർജുൻ ഖാർഗെയെ അറിയിച്ചതായാണ് പുറത്തുവരുന്ന വിവരങ്ങൾ.

ചൊവ്വാഴ്ച രാവിലെയോടെ ഡൽഹിയിൽ എത്തിയ ഡി.കെ. ശിവകുമാർ നേരത്തെ കെ.സി. വേണു ഗോപാലുമായി സംസാരിച്ചിരുന്നു. ഇതിന് പിന്നാലെ കോൺഗ്രസ് അധ്യക്ഷൻ മല്ലികാർജുൻ ഖാർഗെയുമായുള്ള കൂടിക്കാഴ്ചയും നടന്നിരുന്നു. കർണാടകയിലെ മുഖ്യമന്ത്രി ഫോർമുലയെപ്പറ്റി മല്ലികാർജുൻ ഖാർഗെ ഡി.കെ. ശിവകുമാറിനെ ധരിപ്പിച്ചതായാണ് പുറത്തുവരുന്ന വിവരം. ഡി.കെയുടെ ആവശ്യങ്ങളും ഖാർഗെ കേട്ടു.

ഖാർഗെയുടെ വീട്ടിൽ നിന്ന് ഡി.കെ. പോയതിന് പിന്നാലെ സിദ്ധരാമയ്യ ഖാർഗെയുടെ വീട്ടിലെത്തി. ഡി.കെയുമായി ചർച്ച ആയതിന്റെ വിവരങ്ങളും മുഖ്യമന്ത്രി സ്ഥാനത്തെപ്പറ്റിയുടെ കാര്യങ്ങൾ ഇരുവരുടേയും കൂടിക്കാഴ്ചയിൽ ചർച്ചയായി.

ഇരുവരേയും കേട്ട ഖാർഗെ, സോണിയാ ഗാന്ധിയുമായും രാഹുലുമായും ചർച്ച നടത്തിയ ശേഷം പ്രഖ്യാപനം ഉണ്ടാകുമെന്നാണ് ലഭിക്കുന്ന വിവരം. നേതാക്കളെല്ലാം നിലവിൽ ഡൽഹിയിൽ ആണ്. ബെംഗളൂരുവിൽ വെച്ച് മുഖ്യമന്ത്രി പ്രഖ്യാപനം നടത്താനാണ് നേതൃത്വം തീരുമാനിച്ചിരിക്കുന്നതെന്നും റിപ്പോർട്ടുണ്ട്.